ایک نیوز:نائب وزیر اعظم و وزیرخارجہ محمد اسحاق ڈار  کا کہنا ہےکہ  پاکستان اپنے پانی کے حصے کے تحفظ کیلئے  تمام ضروری اقدامات کرے گا۔

ترجمان دفتر خارجہ  کے مطابق سندھ طاس معاہدے کے معاملے پر اعلیٰ سطح اجلاس ہوا، جس کے صدارت نائب وزیراعظم اسحاق ڈار نے کی،اجلاس میں وزرائے قانون و انصاف، آبی وسائل، اٹارنی جنرل، سینئر حکام اور ماہرین شریک ہوئے۔

نائب وزیراعظم  اسحاق ڈار نے اجلاس سے خطاب کے دوران کہا  کہ انڈس واٹر ٹریٹی کو معطل کرنا بھارت کا یکطرفہ اور غیر قانونی اقدام ہے، بھارت کا اقدام بین الاقوامی قوانین، ریاستی تعلقات کے اصولوں اور معاہدے کی خلاف ورزی ہے، پاکستان اپنے پانی کے حصے کے تحفظ کے لیے تمام ضروری اقدامات کرے گا،  انڈس واٹر ٹریٹی خطے کے استحکام کے لیے ناگزیر ہے، انڈس واٹر ٹریٹی کی حرمت کا ہر صورت تحفظ کیا جائے گا۔

انہوں نے کہا کہ  دریائے سندھ کے پانی پاکستان کے 24 کروڑ عوام کی زندگی کا ذریعہ ہیں، بھارت کے پانی کو بطور ہتھیار استعمال کرنے کی کوششوں کی مذمت کرتے ہیں، پاکستان انڈس واٹر ٹریٹی پر مکمل عملدرآمد کے لیے اپنی کوششیں جاری رکھے گا، پاکستان اپنے پانی کے حقوق اور عوام کی فلاح کے تحفظ کے لیے جدوجہد جاری رکھے گا۔